Një ngjarje e rëndë është shënuar në orët e para të mëngjesit të sotëm në burgun e Fushë-Krujës, ku i paraburgosuri Qani Hamit Muça është gjetur i vetëvarur në tualetin e dhomës ku qëndronte.
Sipas burimeve zyrtare, rreth orës 03:34, në sektorin 2, kati i dytë, godina B e IEVP-së, një nga të paraburgosurit vuri re vonesën e pazakontë të Muçës në tualet dhe, pas hapjes së derës, e gjeti atë të varur në grilën e ajrimit.
Menjëherë u njoftuan shërbimet e sigurisë dhe stafi mjekësor, ndërsa më pas u informuan Prokuroria e Krujës dhe Shërbimi i Kontrollit të Brendshëm në Burgje.
Grupet hetimore mbërritën në vendngjarje rreth orës 04:00 dhe nisën veprimet për dokumentimin e plotë të rastit.
Qani Muça, 57 vjeç, i lindur në Dibër dhe banues në Tiranë, ishte arrestuar më 12 gusht 2024 për akuzat “Vrasje e funksionarëve publikë”, mbetur në tentativë, dhe “Mbajtje pa leje e armëve dhe municioneve”.
Ai ishte transferuar nga burgu “Jordan Misja” në Fushë-Krujë më 28 shtator të po atij viti.
Muça ishte i divorcuar, me arsim të mesëm dhe pa precedentë penalë të mëparshëm.
Drejtoria e Përgjithshme e Burgjeve ka shprehur ngushëllimet për familjen e të ndjerit, ndërsa hetimet për zbardhjen e plotë të rrethanave të kësaj ngjarjeje vijojnë.
