Babai i të shpallurit në kërkim për kokainën e kapur në Durrës ka reaguar menjëherë pas lajmit për përfshirjen e të birit.
Avokati Ilir Malindi, në një reagim për gazetën “Panorama”, është shprehur se djali i tij nuk ka lidhje me trafikun e kokainës,
Më tej ai shtoi se i biri është shpallur në kërkim, pasi një nga të arrestuarit i ka përmendur emrin.
Malindi tha se djali i tij do të qëndrojë në arrati, derisa çështja të marrë zgjidhje në rrugë ligjore.
“Djali im s’ka lidhje fare me bllokimin e lendes narkotike ne port. Eshte shpallur ne kerkim pasi dikush nga keta qe jane arrestuar kane permendur emrin e tij. Djali nuk ka asnje lidhje. Do merremi ne rruge ligjore. Nuk ka asnje prove apo pergjim qe implikon tim bir. Ai do të qendroj ne arrati deri ne momentin qe do te marrë zgjidhje kjo situate ne rruge ligjore”– ka thene ai ne nje reagim per “Panorama”.
Ditën e sotme në portin e Durrësit u sekuestrua 137 kg kokainë, e fshehur në kontenierët me banana. Droga ishte nisur nga Ekuadori dhe kishte ndaluar më parë në Greqi, ku autoritetet helene njoftuan palën shqiptare për ngarkesën.
Gjithashtu policia greke zëvendësoi kokainën me oriz, si dhe vendosi një GPS brenda ngarkesës.
Tre ditë pasi kishte mbërritur në portin e Durrësit, Altin Myslimhaka dhe Ardian Bega shkuan për të marrë ngarkesën dhe tashmë janë të arrestuar.
