Realizohet arrestimi në Vienë i Kasandër Nogas, i cili akuzohet për atetantin ndaj Erion Hasanbelliut. Ky i fundit u qëllua me 6 plumba në qendër të Brukselit mbrëmjen e së shtunës, dhe aktualisht ndodhet në gjendje të rëndë për jetën në spital.
Autoritetet arritën në konkluzionin në lidhje me atentatorin që dyshohet se është Kasandër Noga, për shkak se ky i fundit ka një histori hakmarrje të vjetër me personin në fjalë. Noga është person i njohur edhe për drejtësinë shqiptare, pasi është i akuzuari kryesor për “masakrën e sanatoriumit” të ndodhur para 22 vitesh, nga e cila mbeti i vrarë babai dhe shoku i vëllezërve Hasanbelliu.
Historiku i ngjarjeve
Vritet vëllai i Kasandër Nogës nga Aqif Hasanbelliu dhe Dritan Hajdini
Më pas në 19 gusht të vitit 2000 (masakra e sanatoriumit), Kasandër Noga hakmerret për vrasjen e vëllait të tij. Ai hyri në sanatorium i shoqëruar nga Julian Çela dhe pasi shkelmuan dhomën e reanimacionit ku ndodheshin të shtruar Aqif Hasanbelliu (babai i vellezërve Hasanbelliu) dhe Dritan Hajdini, shoku i Geronit, u ka hequr serumin nga krahu dhe me breshëri automatiku i ka lënë të vdekur në vend.
Vëllezërit Hasanbelliu vihen në ndjekje të djaloshit nga Patosi i Fierit dhe dy vjet më vonë, më 17 mars të vitit 2002, Geroni së bashku me Erionin, tentojnë të hakmerren.
Në Anversë të Belgjikës, ata ekzekutojnë Julian Celën dhe plagosin rëndë Kasandër Nogën në një lokal të hapur në qytetin e dytë me të madh belg pas Brukselit.
Pas ngjarjes në Belgjikë, Geroni arriti të arratisej dhe u strehua në Itali, ku u arrestua në vitin 2009 dhe u ekstradua në Shqipëri.
Kurse Kasandër Noga, autori i masakrës së Sanatoriumit, u arrestua nga policia belge gjatë vitit 2003 dhe në 2005-ën u ekstradua në Shqipëri, pasi mbi të rëndonte një dënim me burgim të përjetshëm, por u shpall i pafajshëm nga gjykata disa vite më pas.
