Skuadra e Juventusit shpërdoroi avantazhin e dy golave kundër Udines për tu kënaqur në fund me një pikë, pasi ndeshja përfundoi me shifrat 2-2. Një nga golat e Udineses erdhi nga një gabim i portierit Szczesny që provoi të bënte një driblim por gaboi gjithçka duke bërë që kundërshtari t’i merrte topin nga këmbët dhe të shënonte.
Pas ndeshjes ka folur trajneri i Juventusit, Maximiliano Allegri. “Bëmë një ndeshje shumë të mirë, por futbolli i ka edhe këto cmenduri si ato të pjesës së dytë. Fatmirësisht jemi vetëm në javën e parë përndryshe nuk do isha kaq i qetë.
Szczesny është një portier shumë i zoti por ndonjëherë duhet të mendojë se nuk është turp ta dërgojë topin në tribunë kur bëhet fjala për të marrë tre pikët. Besoj se me fintet e ka mbyllur për këtë vit’.
Allegri foli edhe për Ronaldon që është përfolur shumë për një largim nga Juventusi. “Nuk ishte zgjedhje teknike lënia e tij në stol. Është thjesht çështje forme. Ishte zgjedhja ime për ta lënë Ronaldon në stol, nuk ma kërkoi ai dhe askush tjetër”.
Trajneri i Juventusit mori përsipër edhe një pjesë të fajit për atë barazim ndaj Udineses. “Sot për herë të parë bëra 5 zëvendësime. Kur ke kaq shumë ndërrime, mund edhe të gabosh. Ndoshta kundër Udineses gabova edhe unë me zëvendësimet e bëra’’, përfundoi Allegri.
