Gjykata e Posaçme Kundër Korrupsionit dhe Krimit të Organizuar (GJKKO) ka ndryshuar masën e sigurisë për biznesmenin Gazmend Haxhia, nga ‘arrest shtëpie’ në ‘detyrim paraqitje’, në lidhje me dosjen SASPAC. Në këtë dosje më herët u arrestuan Ilir Beqaj dhe dy bashkëpunëtorët e tij, Ermal Kurtulaj dhe Alfred Nikolli.
Haxhia nuk iu përgjigj interesit të mediave për njohjet apo lidhjet e tij me Ilir Beqajn, dhe nuk dha asnjë deklaratë konkrete për aksionet e tij në një hotel në bregdetin e Durrësit ku është aksioner së bashku me Redi Mollën.
Burime nga brenda gjykatës konfirmojnë se Haxhia ka deklaruar se nuk ka lidhje me akuzat e ngritura nga SPAK. Mbrojtja ofroi garanci pasurore për heqjen e masës së sigurisë, por gjykata nuk e pranoi këtë kërkesë.
Gazmend Haxhia u ndalua në aeroportin e Rinasit ku iu komunikua urdhëri i gjykatës. Ai dyshohet të jetë një nga përfituesit në mënyrë abuzive të fondeve të BE përmes agjencisë SASPAC që drejtohej nga Ilir Beqaj.
