Talibanët kanë hyrë të dielën në kryeqytetin e Afganistanit, Kabul, ndërsa një zyrtar tha se Presidenti Ashraf Ghani ishte larguar nga qyteti për në Taxhikistan.
Zyra e presidentit nuk ka pranuar të japë komente të mëtejshme duke u shprehu se “nuk mund të thotë asgjë për lëvizjen e Ashraf Ghani për arsye sigurie”.
Një përfaqësues i talebanëve tha se grupi po kontrollonte për vendndodhjen e Ghanit.
Diplomatët amerikanë u evakuuan nga ambasada e tyre me një helikopter pas një përparimi të shpejtë nga militantët, të cilët ishin gati të drejtonin Afganistanin përsëri 20 vjet pasi u rrëzuan nga forcat e udhëhequra nga SHBA pas sulmeve të 11 shtatorit në Shtetet e Bashkuara.
Reuters citon një zyrtar të lartë të ministrisë së bredshme afgane, i cili ka thënë se talibanët po arrinin në kryeqytet nga të gjitha anët.
Raportime për luftime nuk ka pasur dhe zëdhënësi i grupit Zabihullah Mujahid tha se ata ishin duke pritur në periferi dhe ishin në bisedime me qeverinë e mbështetur nga Perëndimi për një dorëzim paqësor.
Përfaqësuesit nga të dy palët do të takoheshin në Katar të Dielën, tha Fawzi Koofi, një anëtar i ekipit negociator të Kabulit, për Reuters. Një burim i njohur me çështjen tha se ata do të diskutonin një kalim të pushtetit dhe zyrtarët amerikanë gjithashtu do të përfshiheshin.
