Shoqata e Transportit Ndërqytetas dhe Rrethqytetas i ka kërkuar qeverisë të marrë masa për humbjet ekonomike, për shkak të koronavirusit.
Në kërkesën drejtuar qeverisë, Shoqata kërkon plotësimin e 5 kërkesave.
Në mesin e tyre është mbështetja me një fond prej 32.500.000 lekësh për rrogat e stafit, që duhet të lëshohen brenda 10 prillit.
Gjithashtu ata kërkojnë shtyrjen e pagesës së taksave vendore për 6 muaj dhe furnizimin me alkool dhe doreza.
Kërkesat drejtuar qeverisë
1-Mbështetjen me një fond prej 32 500 000 lekësh për pagesat e 2500 shoferëve, faturinove, financierëve, juristëve, drejtuesve teknik, operatorëve, agjentëve dhe administratorëve me gjysmën e një page minimale prej 13 000 lekësh, të cilët presin të paguhen brenda 10 të muajit prill.
2-Faljen e pagesës së sigurimeve shoqërore dhe tatimit mbi fitimin për një periudhë 3 mujore.
3-Shtyrjen e pagesave të kredive për një periudhë 3 mujore pasi bankat nuk po e respektojnë urdhrin e BSH.
4-Shtyrjen e pagesës së taksave vendore për një periudhë 6 mujore
5-Furnizimin me 2500 maska, doreza dhe 500 litra alkool.
Për të parandaluar përhapjen e koronavirusit, qeveria ka marrë disa masa shtrënguese, në mesin e tyre edhe ndërprerja e transportit urban dhe interurban.
Gjithashtu është ndaluar edhe qarkullimi i makinave private, ndërsa përjashtim bëjnë makinat shtetërore dhe ato të shërbimeve të emergjencës.
Aktualisht në vendin tonë numërohen 42 të infektuar nga koronavirusi dhe 1 viktimë.
Në repartin e Infektivit janë shtruar 17 persona, 3 prej të cilëve ndodhen në terapi intensive.
