Kreu i Partisë Demokratike, Lulzim Basha pritet që të mbajë një takim me drejtuesit politikë të PD nëpër qarqe në selinë blu.
Takimi pritet të mbahet në orën 18:30. Ende nuk dihet për çfarë do të diskutohet me drejtuesit e PD nëpër qarqe, por pak para numërimit të kutive të fundit rezultatet nxjerrin fituese Partinë Socialiste me një avantazh të dukshëm.
Gjatë ditës së sotme në takimin me kreun demokrat pritet të jenë edhe dy aleatët e tij, Spëtim Idrizi nga PDIU dhe Fatmir Mediun nga Partia Republikane. Ndërkohë, në selinë e PD ndodhet gjithashtu edhe sekretari demokrat për çështjet zgjedhore, Ivi Kaso.
Nga numërimi i pjesës më të madhe Qendrave të Votimit, Partia Socialiste rezulton fituese me 734605 ose ndryshe 74 mandate. Partia Demokratike ka arritur të sigurojë vetëm 59 mandate nga 594959 që ka marrë deri tani.
Për socialistët ky do të jetë mandati i tretë i qeverisjes pas 8 viteve të kaluara në pushtet. Nga ana tjetër, opozita sërish nuk arrin të fitojë që prej vitit 2013. Në humbjen e zgjedhjeve të vitit 2017, kreu demokrat Lulzim Basha ngriu të gjitha funksionet në parti deri në zgjedhjet e reja të brendshme, ku u zgjodh sërish kryetar i PD. Ende nuk dihet nëse Basha do të japë dorëheqjn pas humbjes së radhës.
