Një akt ndëshkimi që shkon përtej çdo kufiri njerëzor po gjykohet në Gjermani. Në Gjykatën e Qarkut të Këlnit po shqyrtohet rasti i një bande droge, ku një shqiptar, i konsideruar si shef i grupit, dyshohet se i ka prerë gishtat e këmbës një shitësi kokaine, vetëm sepse ky i fundit humbi telefonin e “punës”.
Telefoni nuk ishte i zakonshëm. Ai përmbante kontaktet e klientëve, organizimin e shitjeve dhe rrjetin e shpërndarjes së kokainës. Kur pajisja u zhduk, banda reagoi me dhunë ekstreme. Shitësi u thirr në një apartament në lagjen Kalk dhe aty nisi ferri.
Sipas aktakuzës, ai u mbajt peng për më shumë se një javë. U torturua çdo ditë për ta detyruar të tregonte se ku ishte telefoni ose të pranonte se e kishte dorëzuar te policia. Shefi i bandës nuk e besonte versionin se telefoni ishte humbur rastësisht.
Ndëshkimi kulmoi me një akt barbar: me një pincë, autorët tentuan t’i prisnin gishtat e këmbës. Viktima deklaroi në gjykatë se dy gishtërinj iu prenë realisht dhe se vetëm ndërhyrja e mjekëve bëri të mundur që t’ia qepnin përsëri në spital.
Prerja e gishtave nuk ishte e vetmja formë dhune. Viktima u lidh disa herë me një copë pëlhure deri sa humbiste ndjenjat. U godit në kokë me një pjatë, iu vendos një shufër hekuri e nxehur mbi trup duke i shkaktuar djegie dhe iu shtypën cigare të ndezura në fytyrë. Një nga autorët i drejtoi edhe pistoletën duke i thënë: “Do të të vras”.
Kur torturuesit u larguan për pak kohë, viktima arriti të kërkonte ndihmë dhe u lirua nga banesa. Ai u dërgua në spital me plagë të rënda dhe qëndroi i shtruar për disa ditë.
Edhe pse aktakuza flet për tentativë prerjeje, dëshmia e viktimës ishte e prerë: “Më prenë dy gishtërinj të këmbës”.
Në sallën e gjyqit, 33 vjeçari nuk pranoi të tregonte vendbanimin aktual. Avokatja e tij tha se ai jeton ende me frikë. “Jam shumë keq, më kthehen kujtimet”, u shpreh ai, duke refuzuar të hyjë në detaje.
Viktima pranoi se kishte qenë pjesë e bandës së drogës dhe se për këtë ishte dënuar më herët, por theksoi se asgjë nuk justifikon atë që i është bërë.
Avokati i mbrojtjes, Philipp Thiée, pranoi se klienti i tij kishte qenë i pranishëm gjatë mbajtjes peng dhe kishte ushtruar dhunë, por mohoi përdorimin e armëve apo pincës. Sipas tij, i akuzuari kishte ardhur nga Shqipëria për punë dhe ishte përfshirë në drogë nga një kushëri.
“Ai nuk është krenar për atë që ka ndodhur”, tha avokati, duke shtuar se tentativa për dëmshpërblim ka dështuar për arsye familjare.
Vendimi i gjykatës pritet të merret pas rreth një muaji.
