I njohur si një bastion i djathë, që nuk është drejtuar kurrë nga Partia Socialiste, Shkodra ishte një surprizë në këto zgjedhje, pasi opozita pësoi një humbje të thellë. Kryetari aktual, kandidati i Bashkë Fitojmë, Bardh Spahia i cili realizoi një fitore spektakolare në zgjedhjet e 6 marsit, është mundur nga kandidati i PS, Benet Beci me një diferencë prej afro 11 mijë votash.
Pasi pësoi një humbje të thellë në zgjedhjet lokale Bardh Spahia ka reaguar për humbjen. Në një mesazh në ‘Facebook’ Spahia shprehu mirënjohje për mbështetësit e tij, ndërsa sulmoi maxhorancën.
Ai tha se çdo pushtet i dalë nga bota e krimit nuk jeton gjatë.
“Çdo pushtet i dalë nga bota e krimit dhe paratë e pista nuk jeton gjatë, ndërsa shpirti i lirë i Shkodrës i ka rezistuar edhe kohëve më të errëta. Mirënjohje për të gjithë qëndrestarët dhe ata që nuk bëjnë kompromis për lirinë.”, shkruan Bardhi.
Kujtojmë se Partia Socialiste ka marrë shumicën dërrmuese të bashkive në vend. Kampi socialist deri tani ka marrë 42 bashki ku ka përfunduar votimi, përfshirë edhe bastionet historike të opozitës si Shkodra, Tropoja, Devolli dhe Kukësi. Nga ana tjetër koalicioni “Bashkë Fitojmë” ka fituar 6 bashki duke e tkurrur hartën e demokratëve me humbjen e bastioneve. “Bashkë Fitojmë” ka fituar Pukë, Has, Himarë, Memaliaj, Mirditë, Fushë Arrëz.
