Një ngjarje e rëndë ndodhi dje në kanionin e Holtës në Gramsh. Një 25-vjeçare humbi jetën, pasi e mori rrjedha e lumit.
Desantila Sollaku ishte nisur me autobus nga Lushnja bashkë me familjen e saj për të kaluar një pasdite në bukuritë e kanioneve të Holtës, por gjithçka përfundoi në tragjedi.
25-vjeçarja nuk ia doli dot të mbijetonte edhe pse vëllai i saj ishte futur në ujë për ta shpëtuar. Pjesë e këtij udhëtimi nuk ishte vetëm motra binjake e Desantilës e cila jeton në Gjermani.
Ditën e djeshme dy autobuse ishin nisur herët drejt Holtës. Një autobus ishte nisur nga Lushnja, e një nga Puka. Për shkak të shirave të rëna ditët e fundit në Shqipëri, rrjedha e ujit ishte shumë e fuqishme.
Një grup turistësh kishin hyrë në ujë, e bashkë me ta edhe 25-vjeçarja nga Lushnja e cila humbi jetën tragjikisht.
Rrjedha e ujit mori edhe dy të rritur e katër fëmijë, por për fat të mirë ata u shpëtuan në kohë.
Vëllai i viktimës dhe një afërm i tyre u hodhën në ujë për të shpëtuar 25-vjeçaren me profesion fizioterapiste, por nuk ia dolën dot.
Trupi i saj u gjet 500 metra larg vendit ku e kishte marrë rrjedha e ujit. Mjetet e ambulancës, zjarrfikëset e Gramshit, polumbarët mbërritën në vendin e ngjarjes. Nisën kërkimet për gjetjen e trupit të pajetë të vajzës, ndërsa vëllai i saj mundi të shpëtojë.
Vëllai i 25-vjeçares gjatë përpjekjeve për të shpëtuar motrën pësoi dëmtime dhe për këtë arsye u dërgua në spitalin e Gramshit për të marrë ndihmë mjekësore.
Ngjarja e rëndë e ditës së djeshme, ndodhi pasi turistët nuk kishin marrë informacion më parë për terrenin e vështirë dhe për nivelin e ujit i cili ishte rritur ndjeshëm për shkak të shirave që kishin rënë një natë më parë.
Gjithashtu 25-vjeçarja kishte planifikuar largimin drejt Gjermanisë këtë javë për të punuar si infermiere, pasi përfundoi studimet në Shqipëri. Familja Sollaku ka dy vajza dhe një djalë.
