Është ndarë nga jeta kryetari i Këshillit Bashkiak në qytetin e Kavajës, Ramazan Cara. Bëhet me dije se ai nuk ka mundur t’i mbijetonte infektimit me koronavirus dhe e humbi betejën në moshën 57-vjeçare. Që prej datës 1 shkurt ai kishte rezultuar pozitiv me virusin dhe ishte shtruar në spital së fundi për të marrë mjekim të specializuar. Ai u trajtua fillimisht në banesën e tij, por gjendja u përkeqësua dhe më pas u dërgua në spital. Për ndarjen nga jeta të Carës ka reaguar edhe kryetari i Bashksië së Kavajës, Redjan Krali. Në një postim në rrjetet sociale ai shkruan se ndarja nga jeta e Carës është e rëndë për këdo që pati fatin ta njihte. Krali thotë se Cara ishte një njeri me zemër të butë, dhe një mik besnik. Ai i shpreh ngushëllimet familjes për humbjen e njeriut të tyre të dashur.
Postimi i Kralit:
Shumë u lutëm për ty o mik i mirë, por kjo flamë të mundi! Tepër e hidhur është ikja jote sot, për secilin nga ne që pati fatin të të njihte. Të të njihte zemrën e butë, urtësinë e mendimit, besnikërinë e një miku të rrallë. Nuk ka ngushëllim kjo humbje për familjen tënde; Zoti i dhëntë durim dhe forcë!
Të qoftë dheu i lehtë Ramazan Cara!
