Një ngjarje horror ka ndodhur në spitalin e Përgjithshëm të Pejës, ku një foshnjë ka lindur pa jetë, por trupi i saj është coptuar në lavatriçe. Foshnja është futur bashkë me çarçafët në lavatriçe, në bazë të denoncimit të familajrëve, të cilët kërkuan trupin e pajetë, që ta merrnin me vete për t’i kryer nderimet e fundit.
Por pas refuzimit për t’i dhënë trupin e pajetë të foshnjës, menjëherë kanë shkuar dhe kanë denoncuar rastin në Polici. Deri më tani familja pretendon se nga pakujdesia, foshnja e pajetë mendohet se është futur bashkë me çarçafë në makinën për larjen e rrobave të spitalit. E gjatë proceseve, mendohet se është shpërbërë në disa pjesë.
Lidhur me këtë rast Spitali i Pejës ka njoftuar mbrëmë se janë pezulluar shtatë punonjës. Telegrafi shkruan se në mesin e shtatë të pezulluarve janë 4 mami, pastruesi dhe dy sanitare.
“Spitali të Përgjithshëm në Pejë me qëllimin që të bëjë hetime të papenguara dhe të detajuara për këtë rast deri më tani ka suspenduar 7 punonjës të Spitalit të Përgjithshëm në Pejë dhe është duke zhvilluar procedurat disiplinore me qëllim të zbardhjes së tërë rastit”, thuhet në njoftim.
Por çfarë parashikon ligji për dëmtimin e kufomës?
Në bazë të nenit 421, pika 2, personi që ka dëmtuar kufomën dënohet me gjobë ose me burgim deri në tre vjet.
“Kushdo që pa autorizim heq, dëmton, shkatërron ose fsheh kufomën, një pjesë të saj ose hirin e të vdekurit, dënohet me gjobë ose me burgim deri në tre (3) vjet”, citohet pika 2 e nenit 421.
