Ministri i Jashtëm holandez është shprehur pro Shqipërisë për hapjen e negociatave, pasi vendi jonë do të tregojë hapa konkrete në luftën kundër krimit dhe korrupsionit.
Ministri në detyrë, Ditmir Bushati, priti në zyrën tij homologun holandez, Stef Blok, ku dhanë mesazhe të rëndësishme për anëtarësimin e Shqipërisë në BE. Kryediplomati holandez ndodhet sot në Tiranë për një vizitë zyrtare.
“Ne jemi të angazhuar për perspektivën europiane ama në bazë të progresit të dukshëm dhe konkret. Është i njëjti mesazh që u kam dhënë vendeve aspiruese.
Është mëse logjike që unë të përdor të njëjtat kritere edhe për shtetet aktuale inspiruese për në BE. Jemi shumë të përkushtuar që ta ndihmojmë Shqipërinë që të bëjë progres. Duam që nga secili vend aspirues të arrijmë më tej.“- tha Blok.
Blok nënvizoi edhe dekurajimin e migrimit dhe nënvizoi luftën kundër krimit të organizuar dhe korrupsionit.
“Është e rëndësishme të ruhet fokusi tek konsolidimi i reformave shtesë për tu ruajtur fokusin në luftën kundër korrupsionit dhe krimit të organizuar. Duhen dekurajuar njerëzit për të emigruar në azil. Orvatjet e tyre do të jenë të pafrytshme. Po punojmë së bashku për të luftuar këtë dukuri“- shtoi ai.
