Kryeministri maqedonas, Zoran Zaev ka fituar bindshëm garën e rikonfirmimit si kryetar në partinë LSDM. Zaev është zgjedhur për herë të tretë në krye të Lidhjes Socialdemokrate.
Pas konfirmimit në krye të partisë, Zoran Zaev theksoi se në katër vitet e ardhshme LSDM do të jetë “lokomotiva” që sipas tij do ta çojë përpara shoqërinë e Maqedonisë së Veriut.
“Unë ndiej një përgjegjësi dhe detyrim të madh për të justifikuar pritjet tuaja. Partitë e vërteta shtetndërtuese kanë një përgjegjësi dhe një detyrim për të promovuar demokracinë në radhët e tyre, por edhe në atdhe” tha Zaev.
Në këto zgjedhje, Zaev ishte i vetëm në garë dhe anëtarët e partisë mund të votonin pro ose kundër tij.
Komisioni Qendror i Zgjedhjeve të LSDM-së bëri të ditur se 90 për qind e anëtarëve aktivë të partisë morën pjesë në votime, të cilat zgjatën nga ora 8:00-19:00.
Nga 60 840 pjesëmarrës në zgjedhjen e kreut të LSDM-së, 888 prej tyre votuan kundër, kurse 249 vota ishin të pavlefshme. Anëtarët e partisë në pushtet votuan në 237 vendvotime në të 80 komunat në Maqedoninë Veriore, në përputhje me masat obliguese të Covid-19.
Ai në fakt e drejton partinë prej 8 vitesh, e mori kur ishte në opozitë, teksa vitin e kaluar fitoi zgjedhjet e dyta parlamentare vitin e kaluar duke u zgjedhur për herë të dytë kryeministër i Maqedonisë së Veriut.
