Danimarka ka qenë surpriza më e bukur e këtij edicioni të Kampionatit Europian duke arritur të kualifikohet për në gjysmëfinale të turneut, pas një fillimi dramatik. Gjithçka u duk e vështirë kur ylli i skuadrës, Christian Eriksen pësoi atak kardiak në fushën e lojës që në ndeshjen e parë të ekipit në turne, por danezët e hodhën të gjithën pas krahëve dhe u motivuan edhe më shumë për të vazhduar para.
Ditën e sotme, Danimarka eliminoi Çekinë me rezultatin 1-2 dhe për më tepër me një lojë bindëse, sidomos në repartin defensiv, ku u treguan mjaft të saktë.
Delaney shënoi një gol të hershëm që në minutën e pestë të takimit duke i dhënë avantazhin të besuarve të Kasper Hjulmand.
Po danezët nuk u ndalën me kaq, pasi pak para mbylljes së pjesës së parë shënuan edhe golin e dytë me të zakonshmin Dolberg. Megjithatë Çekia tentoi të rikthehej në lojë me golin e Patrick Schick, që nuk gabon kur i jepet rasti.
Danimarka ia doli ta ruante deri në fund një rezultat të tillë edhe falë mbrojtjes solide dhe formës së mirë të Kasper Schmeichel.
Një fitore në fazën e grupeve, eliminim i Uellsit me katër gola dhe një ndeshje plot siguri përballë Çekisë. Deri tani Danimarka ka merituar titullin “hirushja” e Europianit, ndërsa do të mësojë kundërshtarin nga ndeshja Ukrainë-Angli.
