Komiteti i imunizimit ka marrë vendimin që edhe në Shqipëri të nisë aplikimi dozës së tretë të vaksinës mbi personat 18 vjeç, nëse ka kaluar gjashtë muaj nga aplikimi i dozës së dytë.
Këtë të enjte, Ministria e Shëndetësisë njoftoi se të gjithë personat që janë mbi 18 vjeç, mund të marrin dozën e tretë të vaksinës anti-Covid, nisur nga rastet që janë riinfektuar me Covid-19
Ministrja e Shëndetësisë Ogerta Manastirliu ka apeluar se sot në Shqipëri, çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar.
Vaksinimi është i hapur edhe për fëmijët +12 vjeç me probleme të sistemit imunitar, me rekomandim nga mjeku.
Gjithashtu në vend ka disa kohë që ka nisur vaksinimi me dozën e tretë, sipas rekomandimit të mjekut të familjes.
Një muaj më parë, komiteti teknik i ekspertëve në rekomandimet e fundit vendosi marrjen e një doze të tretë të vaksinës për të gjithë personat mbi 60 vjeç. Shqipëria iu bashkua vendeve të shumta që kanë nisën të aplikojnë dozën e tretë të vaksinës.
“Qytetarët të cilët mbi 60 vjeç të bëjnë dozën e tretë të vaksinës, jo më herët se sa 6 muaj pasi kanë bërë dozën e dytë, sipas udhëzimeve të hollësishme që jep Instituti i Shëndetit Publik, duke filluar kjo që nga data 1 nëntor e këtij viti. Fëmijët të cilët janë mbi 16 vjeç do të ftohen për t’u vaksinuar edhe ata gjithmonë me konsentin e prindit, me rekomandimin e mjekut të familjes ose mjekut pediatër, në përputhje me udhëzimet e Institutit të Shëndetit Publik, duke filluar edhe këto nga data 1 nëntor e këtij viti. Do të ftojmë për vaksinim edhe fëmijët të cilët janë 12 – 15 vjeç dhe paraqesin sëmundje që kanë të bëjnë me ulje të imunitetit”, bëri të ditur para një muaji kryetarja e Komitetit të Ekspertëve Mira Rakacolli.
