Para pak muajsh, autoritetet në Maqedoninë e Veriut njoftuan se nga data 1 shtatori 2021 e deri me tutje asnjë nuk do të futet në territoret maqedonase pa certifikatë ne vaksinimit. Mësohet se pas lehtësimit të masave certifikata e vaksinimit për të hyrë në RMV nuk do të duhet më. Kjo masë u hoq me vendim të Qeverisë, sipas rekomandimit të Komisioni për sëmundjet infektive.
“Në seancën e sotme të Qeverisë miratuam rekomandimin e Komisionit për Sëmundje Infektive për të shfuqizuar detyrimin e posedimit të certifikatës së vaksinimit, certifikatës për Covid 19 të kaluar, testet negative PCR dhe antigjen për të gjithë qytetarët vendas dhe të huaj gjatë hyrjes në vend. Në lidhje me këtë vendim shfuqizuam edhe masën për izolim shtëpiak me shpenzim personal në kohëzgjatje prej 7 ditëve për hyrje në shtet pa dokumentet e lartë përmendura”, thonë nga Qeveria.
Qeveria miratoi heqjen e masës për mbajtjen e detyrueshme të maskave në ambiente të mbyllura, me përjashtim të shtëpive shëndetësore, farmacive, transportit publik dhe shtëpive të të moshuarve dhe institucioneve për përkujdesje për personat me aftësi të kufizuara. Nga Komisioni për sëmundje infektive thonë se mbeten syçelë për ecurinë e pandemisë. Zëdhënësi i KSI-së bëri thirrje që qytetarët të kenë kujdes gjatë grupimeve familjare gjatë festës së Pashkëve dhe Bajramit.
