Në emisionin “Koha për t’u zgjuar”, mëngjesin e sotëm ishte i ftuar këshilluesi i mjekësisë holistike, Nikol Andoni, i cili foli mbi hipertensionin, duke theksuar se ky problem shëndetësor nuk ka bazë trashëgimore apo gjenetike, por ndikohet kryesisht nga stresi dhe mënyra e jetesës.
Sipas Andonit, ngritja e tensionit shpesh lidhet me ndryshimet e temperaturës, të cilat rrisin kërkesën për oksigjen dhe lëndë ushqyese në trup.
“Temperaturat rrisin kërkesat për më shumë oksigjen dhe elemente ushqyes. Ndaj rritja e tensionit që ndryshon nga temperatura, është një analiza që trupi i bën vetes për të të treguar se diçka nuk shkon, pra është pasojë jo shkak,” tha Andoni.
Duke sfiduar një nga perceptimet më të zakonshme, ai deklaroi se tensioni 12 me 8 nuk duhet të konsiderohet vlera fikse për të gjithë.
“Deri në vlerat 13.9 me 90 në fakt hyn në presionin e gjakut që duhet të quhet normal. Brenda këtyre vlerave jemi në rregull. Duhet të shqetësohemi me 16:10. Edhe këtu jemi në kushte që me ndryshimin e stilit të jetës dhe kontrollin e stresit mund të ndryshojnë. Mjeku i familjes e quan çdo vlerë mbi 12:8 hipertension,” u shpreh këshilluesi i mjekësisë holistike.
Ai gjithashtu vuri në dukje se shumë pacientë maturojnë vlera më të larta të tensionit gjatë vizitave mjekësore për shkak të stresit dhe ankthit, ndaj rekomandoi që matjet të bëhen në kushte qetësie.
“Sa i përket matjes së vlerave, e mira është të matet në kushte qetësie. Shumica e pacientëve janë në ankth dhe stres kur shkojnë tek mjeku dhe i dalin edhe vlerat më të larta.”
Një tjetër pikë e rëndësishme që ai ngriti ishte lidhja mes rezistencës ndaj insulinës dhe hipertensionit. Sipas tij, rritja e nivelit të sheqerit në gjak ndikon në shkaktimin e stresit dhe inflamacionit të vazhdueshëm, gjë që dëmton enët e gjakut dhe çon në ngritjen e tensionit arterial.
“Rezistenca ndaj insulinës rrit sheqerin në gjak, shkakton stresin dhe inflamacion kronik të ulët. Këto bëjnë që të na dëmtohen rrugët arteriale që ndikon më pas në tension”, tha ai.
