Autostrada Millot-Fier do të jetë një tjetër PPP të cilën qeveria shqiptare po orvatet që ta japë me pagesë në kurriz të taksapaguesve shqiptarë.
Shtatori duhet të kishte qenë dhe muaji kur qeveria do të përzgjidhte edhe ofertat e kompanive, por Ministria e Infrastrukturës dhe Energjisë, ka argumentuar se kjo vjen në një kohë kur kompanitë kanë kërkuar më shumë kohë, për përgatitjen e dosjeve për shkak të vështirësive që janë krijuar nga pandemia.
Nisur nga kjo, Ministria e Infrastrukturës dhe Energjisë (MIE), ka shtyrë me një muaj afatin për dorëzimin e ofertave për projektin “dhënie me koncesion/partneritet publik privat (PPP) e projektimit, ndërtimit, operimit, mirëmbajtjes, rehabilitimit dhe transferimin e segmentit rrugor Milot – Thumanë – Kashar – Luzi i Vogël – Fier”.
Data e re finale për paraqitjen e ofertave është 28 tetori, teksa më herët ishte 28 shtatori.
Ministria e Infrastrukturës dhe Energjisë ka argumentuar se, kjo vjen në një kohë kur kompanitë kanë kërkuar më shumë kohë për përgatitjen e dosjeve, për shkak të vështirësive që janë krijuar nga pandemia.
Por “GazetaReforma.com” ka mësuar nga burime brenda MIE-s, se më shumë se sa një zgjatje afati për dokumentacion të paplotësuar, duket se ministria e Belinda Ballukut, po përpiqet që të “kopsitë” çështjen e paracaktimit të fituesit të PPP-së, pa hasur në kontestimin e operatorëve të tjerë.
“Duke vlerësuar situatën tepër të vështirë, të krijuar jo vetëm në vendin tonë por në mbarë botën nga gjendja epidemiologjike (sëmundja SarsCov2, virusi Covid-19), gjë e cila ka ndikuar në mënyrë të drejtpërdrejtë në veprimtarinë e subjekteve tregtare dhe më gjerë si dhe nisur nga kërkesa e vazhdueshme e operatorëve të ndryshëm, drejtuar AK për vështirësitë e hasura në përgatitjen si dhe dorëzimin e të gjithë dokumenteve të kërkuara sipas DPK dhe si rrjedhim me kërkesën për më tepër kohë në hartimin dhe plotësimin e tyre, vlerëson nevojën e shtyrjes së afatit të dorëzimit të ofertave të procedurës me objekt “Dhënie me koncesion/PPP Projektim, ndërtim, operim, mirëmbajtje, rehabilitim dhe transferim i segmentit rrugor Milot-ThumanëKashar- Luzi i Vogël- Fier”,- thuhet në dokumentin e MIE.
Projekti për rrugën Milot-Fier
Ministria e Infrastrukturës dhe Energjisë e hapi procedurën për rrugën Milot -Fier në muajin korrik të këtij viti. Kjo rrugë, sipas prezantimit që bëri në atë kohë ministrja Balluku, do të jetë e gjatë 115 kilometra dhe do të përshkohet për 75 minuta. Rruga do të ndërtohet nga koncesionari dhe do të jetë me pagesë.
Sipas dokumenteve qeveria është angazhuar që të garantojë maksimalisht 121 milionë euro për koncesionarin për 17 vitet e para të operimit nga vitit 2024 që parashikohet të jetë viti i parë deri në vitin 2040 teksa të ardhurat bazë përgjatë kësaj periudhe janë vlerësuar 1.7 miliardë euro.
Koncesisoni ka një afat 35-vjecar por trafiku do të garantohet për më pak se gjysmën e viteve të operimit. Kjo është garancia maksimale që ka vlerësuar qeveria në dokumentet e saj dhe si kriter përzgjedhës për operatorin do të funksionojë skema se kush do kërkojë më pak garanci nga shteti.
Sipas tabelës së dhënë nga MIE në vitin e parë të operimit të ardhurat bazë të vlerësuara nga shteti janë 60 milionë euro dhe garancia maksimale nga shteti është 4.2 milionë euro.
Në vitin e dytë 2025 të ardhurat e parashikuara janë 62.6 dhe maksimumi që mund të garantojë shteti janë 4.3 milionë euro. E kështu vazhdon logjika me një garanci maksimlae prej 7% të vlerës bazë të të ardhurave deri në 2040 kur parashikohet që vlera bazë e të ardhurave të jetë 1.7 miliardë euro për konceisonarin dhe maksimumi i garancisë që mund të jetë dhënë nga shteti në rast të mungesës së trafikut 121 milionë euro.
/Burimi: Monitor.al/ Përshtati: GazetaReforma.com/
