Edhe pse jemi në mes të sezonit turistik, shumë qytete në vendin tonë janë “pushtuar” nga plehrat, duke u kthyer në një “kancer” për banorët e zonës, por jo vetëm.
Pas Durrësit, radhën e ka Kurbini.
Banorët e këtij të fundit janë ankuar pasi nuk ka më vend për hedhjen e mbeturinave.
Ata ankohen gjithashtu edhe për mungesën e kontejnerëve.
Pirgje të mëdha mbeturinash të zë syri në çdo anë të rrugës së Adriatikut, si të ishin “vepra zbukuruese” për turistët e pakët që priten të vijnë këtë vit në vendin tonë për shkak të pandemisë Covid-19.
E sikur të mos mjaftonte pandemia për rënien e turizmit, ne edhe ata turistë të pakët që priten të vijnë, po i përzëmë me duart tona për shkak të kaosit në të cilin ndodhen shumë qytete turistike në vendin tonë.
Kjo është panorama që të ofrohet përgjatë udhëtimit nga Laci në fshatin Adriatik, një rrugë që të çon buzë detit.
Pirgje të mëdha mbeturinash dhe inertesh kanë mbuluar të dy anët e rrugës me gjatësi 11 km që fshatin Adriatik me rrugën nacionale.
Banorët i kanë hedhur mbeturinat në anë të kanalit në rrugë, e kur pirgjet bëhen të mëdha, mbetjeve iu vihet flaka.
Bashkia e Laçit nuk merr asnjë masë për të zgjidhur problematikën e mbartur prej vitesh.
“Mbeturinat këtu janë më keq se në landfill. Këtu s’ka kosha mbeturinash. Kush të mundet vjen e hedh këtu.
Lokalet i hedhin këtu, dallohen shishet. Në bashki kam bërë ankesë por askush nuk ka ardhur shprehet një banor”, shprehet një banor i zonës.
Me rritjen e temperaturave situata bëhet më e vështirë dhe e rrezikshme për shëndetin e banorëve të Adriatikut, kjo duke marrë parasysh se ndodhemi edhe në mes të një pandemie vdekjeprurëse, ku mjekët insistojnë vazhdimisht për mbajtjen e higjenës.
