Komisioni i Pavarur i Kualifikimit ka shkarkuar ditën e sotme prokurorin e Krimeve të rënda, Eugen Beçin. Ky i fundit ka rezultuar me probleme në deklarimin e pasurisë.
Në seancën e sotme Beçit i është komunikuar edhe shkarkimi, pasi KPK i kiste gjetur mangësi në dy hetimet e kryera në lidhje me pasurinë dhe figurën.
Po ashtu në seancën dëgjimore, Beçit iu vu në dukje se hetimi i kishte gjetur një sërë problemesh në pasurinë e tij dhe kryesisht blerjen e një apartamenti 169 metra katrorë në Tiranë.
Probleme iu gjetën edhe gjatë kontrollit të figurës, përfshi kontaktin e papërshtatshëm me një person, të publikuar gjatë debatit publik për të ashtuquajturin “komplot për vrasjen e deputetit Tom Doshi”, i cili rezultoi më pas një ngjarje e sajuar.
KPK bëri të ditur se hetimi ishte fokusuar tek blerja përmes shkëmbimit të një apartamenti rreth 169 metra katrorë. Burimi i deklaruar për këtë pasuri ishte një apartament 83 metra katrorë, i financuar me kredi të butë dhe dy hua nga vëllezërit prej 4 milionë lekësh.
Gjatë hetimeve për burimin e ligjshëm, KPK hetoi mbi krijimin e pasurisë apartament 83.2 metra katrorë.
Në krijimin e kësaj pasurie janë konstatuar probleme. Beçi ka rezultuar me një kontratë të dytë me probleme, pasi të gjitha lëvizjet e parave nuk provoheshin me asnjë dokumentacion.
Po ashtu nuk provohej me dokumentacion as marrja e huasë nga vëllezërit dhe as kthimi i saj.
Beçi njihet si prokurori që ka hetuar Dritan Dajtin, Behar Kastrati si dhe një sërë çështjesh të bujshme si ato të Bandës së Tritolit, Arben Frrokut, çështjes së Lazaratit, grupit të Kokainës në Xibrakë.
