Dikur, futbollistët kuqezi të Kombëtares kuqezi që mori pjesë në Europianin e vitit 2016 në Francë, ishin heronj kombëtare. Dikur, pasi tani gjërat kanë ndryshuar. Jo më shumë për skuadrën, pasi disa prej atyre lojtarëve vijojnë të jenë pjesë e kombëtares, por në vendimin që ka qeveria për ata.
Heronj ndoshta janë ende, por jo “ambasadorë të mirë”. Në ditën kur Kombëtarja kuqezi do të luante sfidën kundër San Marinos, Ministria për Evropën dhe Punët e Jashtme i kujton Federatës Shqiptare (FSHF), që të gjitha subjektet e saj që janë pajisur me pasaportën diplomatike, duhet ta dorëzojnë atë brenda afatit, që është data 30 qershor i këtij viti.
Në një letër të siguruar nga mediat, bëhet e ditur se futbollistët e kombëtares dhe delegacioni i saj u pajisën, me pasaportë diplomatike pas VKM të datës 23 qershor të vitit 2016, pra menjëherë pas përfundimit të aventurës në Kampionatin Europian, por me një tjetër VKM të datës 12 qershor të vitit 2019, këto subjekte nuk cilësohen më si kategori që e gëzojnë këtë të drejtë. Çështje vendimesh dhe ligjesh.
Por e thënë shkurt, futbollistët e kombëtares, ata heronj të Euro 2016, mund të jenë idhuj për njerëzit shqiptar, por jo “ambasadorë të mirë” për qeverinë, të paktën nëse nuk ndodh ndonjë tjetër kualifikim i madh vitet e ardhshme…
