Një ngjarje e rëndë është shënuar këtë pasdite në liqenin e Shkodrës, ku kapiteni i anijes turistike të Bashkisë humbi jetën në përpjekje për të shpëtuar dy turistë të huaj.
Viktima është Arben Alamani, 51 vjeç, i cili u hodh në ujë për të ndihmuar dy turistë që kishin rënë aksidentalisht gjatë një udhëtimi turistik.
Ngjarja ndodhi rreth orës 16:32 dhe, falë ndërhyrjes së tij të menjëhershme, turistët u shpëtuan dhe ndodhen jashtë rrezikut për jetën.
Pavarësisht aktit heroik, kapiteni nuk arriti të dalë gjallë nga uji. Shërbimet e Policisë mbërritën menjëherë në vendngjarje dhe po vijojnë kërkimet për trupin e 51-vjeçarit. Grupi hetimor ka nisur punën për të zbardhur shkaqet dhe rrethanat e incidentit.
Arben Alamani u shua në krye të detyrës, duke bërë gjithçka për të shpëtuar jetën e të tjerëve. Ai kujtohet tashmë si një hero i heshtur, që dha jetën për të shpëtuar të huajt që kishte marrë përsipër t’i udhëhiqte në liqenin e qytetit.
