Mbi 400 pacientë kanë kërkuar ndihmë në Qendrën e Mjekësisë në Deçan, me simptoma të helmimit. Dyshimet për shkakun e helmimit janë te një degë e furnizimit të ujësjellësit “Hidrodrini”. Simptomat ishin marrje mendje dhe të vjella. Sipas të dhënave zyrtare, shqetësime u shfaqën nga banorët e fshatrave Prejlep, Rastavicë, Irzniq, Gllogjan, Shaptej, Gramaqel, Baballoq, Ratishë dhe Jasiq i ri.
Ujësjellësi ndërpreu ujin deri në publikimin e rezultateve të testimit. Qendra e Mjekësisë Familjare në Deçan që nga dita e shtunë, ngriti alarmin për numër të pazakontë të pacientëve, me simptoma të ngjashme.
Drejtori i kësaj qendre, Selmon Berisha tha për REL se pasi e kishin lajmëruar Institutin Kombëtar të Shëndetësisë Publike, ata erdhën dhe morën mostrat e ujit për të bërë analizën kimike dhe biologjike.
“Analizat kimike ka rezultuar në rregull ndërsa analizat biologjike janë në përpunim e sipër. Po ashtu, gjatë gjithë kohës e kemi angazhuar laboratorin tonë dhe analizat e pacientëve rezultojnë që janë helmime bakteriologjike”, tha ai. Zyrtarë të Komunës së Deçanit nuk i janë përgjigjur thirrjeve të deritanishme për koment lidhur me këtë çështje.
Ujësjellësi rajonal “Hidrodrini”, ka bërë ndërprerjen e furnizimit me ujë në zonat e dyshuara për helmim masiv, deri sa të kryhen analizat e ujit dhe të marrin më pas një vendim.
