Prej 4 ditësh spitali i Krujës vijon të mbushet me pacientë të cilët kanë simptoma helmimi, dhe deri më sot ka shkuar në 630 numri i qytetarëve të paraqitur në spital për të kërkuar ndihmë shëndetësore, pas helmimit për shkak të ujit të pijshëm.
Ish kryeministri Sali Berisha ka reaguar për helmimin masiv të qytetarëve që po ndodh në Krujë.
Sipas Berishës shkaku i kësaj situate të krijuar është ujësjellësi elektoral i Edi Ramës por ky fakt po mbahet i fshehtë.
Berisha shtoi gjithashtu se qindra qytetarë po mjekohen në shtëpi për shkak se ka mungesë shtretërish në spital.
Në mbyllje, ish kryeministri i bën thirrje OBSH-së të ndërmarrë një hetim të pavarur për të zbardhur shkaqet e vërteta të këtij helmimi masiv.
Reagimi i ish-kryeministrit Sali Berisha:
Helmimi masiv i qytetarëve të Krujës vepër kriminale e ujësjellësit elektoral të narkoshtetit
Te dashur miq, prej tre ditësh qindra e qindra banorë të qytetit të Krujës u helmuan nga uji i ujësjellësit elektoral të Edvin Kristaq Ramës të inauguruar në kulmin e fushatës elektorale.
Qindra prej tyre mjekohen në shtëpi për mungesë shtretërish në spital.
Gjer tani shkaku real i helmimit mbahet sekret nga narkoshteti vetëm e vetëm për të mos vënë gishtin mbi ujësjellësin elektoral të Edvinit.
Duke ju uruar shërim të shpejtë dhe të plotë të gjithë qytetarëve të Krujës i bëj thirrje OBSH-së të ndërmarrë një hetim të pavarur për shkaqet e vërteta të këtij akti kriminal të narkoshtetit dhe kreut të tij të meduzës.
