Prej dy ditësh një fluks i madh qytetarësh i janë drejtuar spitalit të Krujës me shqetësime të ndryshme, të tilla is diarre, të vjella, temperaturë e dhimbje barku. Rreth 35 persona që kanë shfaqur këto shqetësime janë të moshave të ndryshme, nga fëmijët e deri te të moshuarit, ndërsa i janë drejtuar dyerve të spitalit për mjekim prej më shumë se 24 orëve.
Qytetarët janë banorë në lagje të ndryshme të qytetit dhe kjo gjë çon në dyshime se ata mund të jenë helmuar nga uji i rrjetit, i cili konsumohet masivisht në Krujë.
Ndërkohë, policia njofton se janë njoftuar organet e e shëndetit publik dhe të AKU-së, për të sqaruar këtë situate dhe priten analizat nga DSHP Krujë dhe Tiranë.
Njoftimi i policisë:
Policia e Krujës, pas marrjes së njoftimit mesditën e sotme, nga urgjenca e Spitalit të Krujës, se dy ditët e fundit kanë shkuar për ndihmë mjekësore, rreth 35 shtetas, të cilët dyshohet se janë helmuar, menjëherë ka ngritur grupin hetimor, i cili ka shkuar në spitalin e Krujës dhe vijon punën për sqarimin e rrethanave dhe zbardhjen e shkakut.
Nga ana e Policisë janë njoftuar organet e shëndetit publik dhe të AKU-së, për të sqaruar këtë situatë. Priten analizat nga DSHP Krujë dhe Tiranë.
Grupi hetimor po kryen të gjitha veprimet procedurale, me qëllim zbardhjen e shkakut dhe sqarimin e rrethanave të këtyre rasteve.
