Presidenti i Kosovës, Hashim Thaçi dhe homologu i tij serb Aleksander Vuçiç, do të takohen më 29 prill në kryeqytetin e Gjermanisë.
Lajmin e ka konfirmuar Vuçiç sot në një konferencë për mediat.
Presidenti serb ka theksuar se në takim do të jenë prezent si kryeministri i Kosovës Ramush Haradinaj, ashtu dhe kryeministrja serbe, Ana Brnabiq.
Ka qënë Këshilltari i Presidentit të Kosovës, Bekim Çollaku i cili e ka konfirmuar se Presidenti Hashim Thaçi do të marrë pjesë në takimin e 29 prillit në Berlin të Gjermanisë.
“Po e konfirmoj pranimin e ftesës për Presidentin e Republikës së Kosovës për pjesëmarrje në takimin e liderëve të Ballkanit Perëndimor që mbahet në Berlin me 29 prill,” – ka thënë Çollaku.
Mësohet se ky takim është bërë me inicimin e Francës dhe Gjermanisë dhe pritet të diskutohet rreth situatës aktuale dhe bllokimit të dialogut si dhe gjetjen e një gjuhe të përbashkët për të ecur përpara.
