Taksa prej 100% ndaj Serbisë vazhdon ende të mbetet një problem i madh, mirëpo kryeministri Ramush Haradinaj nuk ka ndërmend të tërhiqet mbrapsht.
Ai vazhdon të insistojë se kjo është mënyra e vetme që të bëjë të arsyetojë Serbinë dhe garanton se kjo nuk do të ndikojë në raportet që Kosova ka me Amerikën.
Në një intervistë për RTV 21, Haradinaj ka thënë se Serbia me paratë që shet në Kosovë, blen armë te armiku i Amerikës, duke aluduar për shtetin rus.
“Vendimi për taksën nuk i është dedikuar Amerikës, por i është dedikuar një kundërshtari që ka pozita armiqësore ndaj Kosovës, e cila me paratë që i fiton duke shitur në Kosovë, blen armë te armiku i Amerikës. Nëse dikush mendon se taksa i prish raportet Kosovë-Amerikë, ose nuk po e lexon mirë politikën, ose ka hall tjetër”, ka thënë Haradinaj.
Edhe pse polemikat për këtë çështje kanë qenë të shumta dhe shumë zyrtarë kanë dalë kundër këtij vendimi, Haradinaj duket i palëkundur në vendimin e tij, madje është i gatshëm të bëjë gjithçka për ta çuar deri në fund.
