Haradinaj duket i vendosur për taksën ndaj Serbisë dhe është i gatshëm të ndërmarrë çdo hap, përveçse ta heqë atë.
Edhe një herë tjetër kryeministri kosovar ka theksuar se nëse Shtetet e Bashkuara kërkojnë që ai të heqë dorë nga posti i kryeministrit, nuk do ta mendonte dy herë, por taksën nuk do ta heqë derisa Serbia ta pranojë Kosovën shtet.
“Po të vije amerikani e të më thotë, ‘Ramush, a po e lëshon detyrën’, unë largohem. Por nuk e çoj dorën ta heq taksën ndaj Serbisë, unë këtë e kam thënë që nuk e bëj.”,- tha ai në një intervistë për televizionin publik.
Kryeministri tha se i beson Amerikës për territorin e Kosovës, ndërsa shtoi se rreziku është te ai. “Rreziku nuk është Amerika, as Evropa, por rreziku jemi ne.”-tha Haradinaj.
Ai pohoi se është keq që aleatët qeveritarë janë ndarë për ta dëmtuar kryeministrin. Ai kërkoi nga të gjitha partitë në Kosovë që të bashkohen për taksën kundër Serbisë.
