Ish-kryeministri i Kosovës, Ramush Haradinaj ka thënë se qeveria është mjaft e kujdesshme në marrëdhëniet me Serbinë, por duke e ndihmuar në interest ekonomike, duke filluar me heqjen e taksës 100%. Në Klan Kosova, Haradinaj ka thënë se ka shumë dëshmi që tregojnë se qeveria Kurti ka qenë e mirëkuptueshme ndaj Serbisë.
“Mendoj se kjo qeveri është mjaft e kujdesshme në marrëdhëniet me Serbinë veçanërisht në aspektin e interesave ekonomike vërtetë i ka ndihmuar Serbisë, prej heqjes së taksës dhe pastaj lehtësira të tjera si rasti i taksës mbrojtëse për bllokat ndërtimor. Janë shumë dëshmi që flasin se qeveria Kurti ka qenë e mirëkuptueshme ndaj Serbisë. Veçanërisht ky mirëkuptim e ka mbërri kulmin te pagesa e rrymës dy herë nga 11 milionë janë shuma të mëdha’, tha Haradinaj.
Ai shtoi se qeveria i ka “përkëdhelur” me kujdes si serbët e veriut ashtu edhe Serbinë, ndërsa për veprimet e sotme tha se janë vazhdim i dakordësimeve të mëparshme.
“Mendoj se i ka përkëdhel me kujdes edhe serbët e veriut edhe Serbinë ndërsa veprimet e sotme janë pasojë e dakordimeve të mëhershme, pra nuk janë rezultat i ri por pasojë, vazhdim i dakordimeve të mëhershme. Nuk e shoh pse duhet Serbia me shpreh nervozë, sepse kjo ka qenë e pritur që do të ndodh”, tha ish-kryeministri.
Haradinaj u shpreh se situatën kryeministri e shfrytëzoi situatën për fushatë, ndërsa shtoi se tashmë nuk duhet të ketë kthim pas.
“Është kohë fushate, kryeministri e shfrytëzoi edhe në parlament. Realisht shpjegimi me tabela ishte i panevojshëm. Mendoj se po zbatohet lidhi dhe po zbatohet Kushtetuta. Ajo që s’duhet të ndodh është të mos ndodh kthimi prapa”, deklaroi kryetari i AAK-së.
