Zëvendëskryeministrja dhe Ministrja e Infrastrukturës dhe Energjisë, Belinda Balluku, ka ndjekur nga afër përgatitjet e fundit për hapjen e tunelit të Llogarasë për qarkullimin e automjeteve paraditen e së premtes. Në këtë inspektim ajo ishte e shoqëruar nga Drejtori i Autoritetit Rrugor Shqiptar (ARRSH), Gentian Gjyli, dhe Kryetari i Bashkisë së Vlorës, Ermal Dredha.
“Jemi në momentet e fundit të përfundimit të tunelit të Llogarasë. Parashikohet që pasnesër, në datë 5, ditë e premte, në orën 10, do të jetë momenti i hapjes së këtij tuneli,” tha Balluku. Ajo theksoi se puna në kantier do të vazhdojë edhe pas hapjes së tunelit, duke përmendur se tuneli po dorëzohet para afatit, siç ka ndodhur me shumë vepra të tjera infrastrukturore të rëndësishme në vend.
Tuneli i Llogarasë, me një gjatësi prej 5.9 kilometrash, është një nga projektet më të rëndësishme infrastrukturore në Shqipëri dhe një nga më të gjatat në Evropë. Balluku e quajti këtë projekt “një gur kilometrik” për historikun e infrastrukturës shqiptare dhe vuri në dukje modernitetin e tij, duke përfshirë menaxhimin elektronik dhe dixhital të tunelit.
“Ky është një tunel totalisht modern nga ana e konstruksionit dhe i menaxhuar në mënyrë elektronike, dixhitale,” tha Balluku. Ajo gjithashtu përmendi qendrën e monitorimit të tunelit të vendosur në Dukat, e cila është ngritur mbi bazën e dixhitalizimit dhe që në të ardhmen do të përdorë inteligjencën artificiale për menaxhimin e flukseve dhe kontrollin e sigurisë rrugore.
Drejtori i ARRSH, Gentian Gjyli, njoftoi se është përgatitur një plan menaxhimi trafiku në bashkëpunim me Policinë Rrugore për tre muajt e ardhshëm. “Shpresojmë që përdoruesit e tunelit të ecin me shpejtësinë e rekomanduar nga Autoriteti Rrugor dhe Policia Rrugore,” tha Gjyli.
Kryetari i Bashkisë së Vlorës, Ermal Dredha, vlerësoi rëndësinë e tunelit të Llogarasë për lidhjen e Vlorës me pjesën tjetër të bregdetit të jugut. “Tuneli i Llogarasë lidh Vlorën me pjesën tjetër të bregdetit të jugut brenda një kohe shumë më të shpejtë dhe me siguri të lartë,” u shpreh Dredha.
Hapja e tunelit të Llogarasë përfaqëson një zhvillim të madh për infrastrukturën e Shqipërisë, duke sjellë përmirësime të mëdha në qarkullimin dhe lidhjet rajonale.
