Zbardhja e komunikimeve të enkriptuara në aplikacionet Sky ECC, EncroChat dhe Matrix ka çuar në goditjen e një prej rrjeteve më të mëdha të trafikut të drogës në Europë.
Hetimi i përbashkët mes SPAK dhe antimafias italiane ka nxjerrë në dritë një strukturë të mirëorganizuar shqiptaro-italiane, që merrej me trafikun e kokainës dhe heroinës nga Amerika Latine drejt Europës, me degëzim të fortë në Shqipëri dhe Itali.
Në kuadër të këtij operacioni, SPAK firmosi 52 urdhër-arreste, prej të cilëve 42 janë zbatuar. Grupi kishte bazën në Durrës dhe funksiononte përmes disa nënstrukturave që bashkëvepronin në trafik droge dhe pastrim parash.
Nga aktet e hetimit italian rezulton se anëtarët e grupit përdornin nofka për të maskuar identitetin dhe për të shmangur ndjekjen e autoriteteve.
Genci Telollari njihej si “Lo Zio”, Nuredin Kiptiu përdorte disa pseudonime si “Nuro”, “Blaki”, “Dino”, ndërsa Ekil Nderjaku figuron me emrin “Kili”. Erigels Presi thirrej “Seriali” apo “Enrico”, ndërsa Adi Coba njihej si “Gipsi” dhe “Bestia”.
Në komunikimet e grupit përfshiheshin edhe shtetase italiane: Serafina Palazzo, e quajtur “la Zia”, dhe Francesca Caputi, që thirrej “la Nonna”.
Gjithashtu, përmendet Giovanni Sgnorile si “Il Padre di quello”, ndërsa Elvis Doçi dhe Ervis Deti shfaqen me nofkat “Visi i Pojës” dhe “Po Po”.
Komunikimet e përgjuara nxjerrin në pah edhe kodet që grupi përdorte për të fshehur përmbajtjen reale të bisedave.
“E bardha” nënkuptonte kokainën, “e kuqja” heroinën, ndërsa termat “mall” dhe “punë” i referoheshin trafikut të drogës. Policia përmendej si “të zinj”, dhe fjalë si “gol” apo “bingo” sinjalizonin një dërgesë të suksesshme.
