Ashtu siç doli dje edhe sot Kryeministri Edi Rama, ka dalë dhe ka përdorur ndaj mediave dhe protestuesve një retorikë të përgatitur për të ofenduar revoltën qytetare.
Kryeministri ka komentuar vrasjen e 25-vjeçarit Klodian Rasha, nga një efektiv policie, dhe për të treguar qëndrimin e tij për ngjarjen.
Por ndër të tjera, Rama do të sulmonte edhe protestuesit teksa u shpreh për ta me termin “halabakë”.
Por këtij qëndrimi të kreut të qeverisë i përgjigjet studiuesi i mirënjohur Aurel Plasari, duke sjellë një shembull nga Rumania e vitit 1989.
Sipas tij, edhe diktatori Çaushesku i quante “halabakë” protestuesit, por fundi i tij duhet tashmë.
Ja postimi i plotë i Aurel Plasarit:
“HALABAKË” IU DUKËN EDHE SHOKUT CEAU?ESCU
Por ja si e gdhendi kujtimin e tyre zonja e madhe poetja Ana Blandiana:
“Kjo që po jetojmë sot dhe ajo që do të jetojmë në vjetët e në dhjetëvjetëshat e ardhshëm do të jetë vepra e atyre fëmijëve të pjellë prej nënash të dëshpëruara ngaqë qenë të detyruara t’i nxirrnin në botë, të rritur në heshtje, në frikë, në të ftohtë e në uri, të ushqyer prej prindërish të terrorizuar që u trembeshin ditë e natë denoncimeve, të kapitur pas orëve të kaluara nëpër radhët e pafundta, të edukuar prej mësuesish të poshtëruar e të detyruar të mos i thoshin ato që mendonin, fëmijë të cilët i mësonin të mos e ngrinin zërin, ta ulnin radion, ta mbulonin me pëllëmbë dorezën e telefonit, t’i shmangeshin shoku-shokut, të mos i hapeshin askujt, të mos i besonin asnjeriu.
Ngjarjet që po jetojmë sot janë vepra e atyre fëmijëve të dënuar me jetë e me vetmi, dhe që, me një përçmim të pamatë për jetën që u qe dhënë pa dashje, e flakën atë mbi banakun e pamëshirshëm të historisë duke paguar me të çmimin e solidaritetit, të dashurisë, të besimit e të shpresës dhe na bënë të gjithëve të rilindim në këto Krishtlindje të përgjakta e sublime.
E ruajttë të pacenuar, kjo kryqëzatë e mrekullueshme e fëmijëve të Rumanisë, lirinë e blerë kaq shtrenjtë dhe e shpëntë përpara nëpër vite, po kaq të pastër e përvëluese, deri në pjekjen e plotë të demokracisë së paprapsueshme”.
/GazetaReforma.com/
