Një keqkuptim mes nxënësve të shkollës “Dom Nikollë Kaçorri” në Durrës u shndërrua në një dramë që askush nuk e kishte imagjinuar. Një 15-vjeçar mbeti i plagosur rëndë pasi u godit me thikë nga shoku i klasës, vetëm sepse kërkoi t’i sqaronte fjalët fyese që kishte dëgjuar prej tij. Ajo që nisi si një “Hajde sqarohemi!” përballë shkollës, përfundoi me një goditje të vetme në zemër.
Telefonata për t’u qartësuar u kthye në sekonda terrori. 15-vjeçari u dërgua me urgjencë në spital, i shtirë në tokë me plagë të thellë në gjoks. Mjekët arritën ta stabilizojnë dhe ta nxjerrin nga intubimi, por gjendja e tij mbetet kritike dhe ai vijon të jetë nën monitorim të rreptë.
Familja është përballur me ankthin më të madh të jetës së tyre. Babai, i rraskapitur nga dita e ngjarjes, dhe nëna, që nuk e përballon dot dhimbjen, presin çdo raport mjekësor me frikën e asaj që mund të vijë.
Në një intervistë në emisionin “Me Zemër të Hapur”, babai rrëfeu momentet e para pas ngjarjes dhe gjendjen aktuale të djalit.
“Kemi dalë nga gjendja e rrezikut. Presim reagimin e trurit dhe më pas të dalim nga intubimi. Më pas do të shohim dëmtime në zemër apo në tru. Këto janë çështje të shëndetësisë dhe me detaje nuk di çfarë të shpjegoj. Por këtë e thotë mjeku i zemrës. Parametrat janë optimale. Kemi një problem të ulur, por një trajektore të mirë. Do të shihen reagimet e djalit, do të shohim maksimumi brenda dy ditëve.
Gruaja është në gjendje jo të mirë, herë qan, herë e mban veten, por na mban besimi te Zoti. Ata kanë debatuar dhe janë sharë me njëri-tjetrin në TikTok për protagonizëm. Ia lëmë dhe shtetit pjesën tjetër.”
Në një prononcim të mëtejshëm, babai rrëfeu edhe se si e mori lajmin e rëndë:
“Për plagosjen e djalit më lajmëroi një shok. Kanë qenë të paktën tre veta të përfshirë. Djali im nuk ka qenë protagonist, ka qenë një tjetër. Dyshoj për autorin sepse e kam parë me shenja në kokë. Jam i lodhur psikologjikisht. Më kanë lajmëruar mua të parin nga familja.”
Fëmijët e klasës së njëjtë, një sherr i nisur në TikTok për protagonizëm dhe një thikë në duart e një të mituri mjaftuan që një 15-vjeçar të përfundojë në luftë për jetën.
Komuniteti shkollor është tronditur. Familja pret përgjigje. Ndërsa mjekët luftojnë çdo orë për stabilizimin e të riut, pyetja që mbetet pezull është: Si mundi një debat fëmijësh të përshkallëzohej deri këtu?
