Sapo ka përfunduar takimi për datën e përshtatshme për zgjedhjet në vitin 2021 midis deputetes së Opozitës Parlamentare Rudina Hajdari dhe presidentit Ilir Meta.
Takimi u mbajt në Presidencë, dhe mësohet se deputetja Hajdari, i ka propozuar Metës datën 2 maj për zgjedhjet e ardhshme parlamentare.
Kujtojmë se më herët gjatë paradites së sotme, në zyrën e presidentit kanë qenë krerët e PDIU-së, LZHK-së, PBDNJ-së, si dhe përfaqësues të PR-së dhe PAA-së, të cilët propozuan në unison datën më të afërt që e lejon Kushtetuta për zgjedhjet e ardhshme parlamentare, datën 18 prill.
Ndërkohë që edhe vetë kryeminstri Rama është shprehur i gatshëm për çdo datë, përveç datës 2 maj, pasi janë Pashkët ortodokse.
Të njëjtin mendim ka ndarë edhe presidenti Meta i cili e ka cilësuar datën 2 maj si jo të mundshme për t’u zhvilluar zgjedhjet pasi është një ditë feste e madhe fetare.
“2 maj është vërtetë një festë ortodokse, ka ndodhur edhe më parë që në Shqipëri të merren vendime politike në ditë feste. Nuk na ndalon asgjë që atë ditë të festojmë festën ortodokse dhe të votojmë, për të zgjedhur ata që janë të ndershëm dhe punëtorë. Dhe jo për të votuar ata pushtetarë që gjithmonë kanë në qendër interesat e tyre”, ka thënë Rudina në një prononcim për mediat pas takimit me Metën.
