Grupi Al-Kaeda që operon në Gadishullin Arabik mori përgjegjësinë për një sulm ndaj një baze amerikane, gjatë të cilit u vranë tre ushtarakë në muajin dhjetor.
Njoftimi u bë në internet nga vetë grupi terrorist.
“Alshamrani kreu operacionin në një nga çerdhet e së keqes, në stacionin detaro-ajror amerikan në Pensacola“, shprehej në një video-mesazh të postuar të dielën drejtuesi i grupit, duke iu referuar Mohamed Alshamranit, një 21-vjeçari i cili kreu sulmin në fund të vitit të kaluar.
Mohamed Alshamrani, një ushtarak i një grade të ulët i Forcave Ajrore të Mbretërisë Saudite, po trajnohej në bazën amerikane që ndodhet në Pensacola të Floridës.
Kreu i AQAP-it, Qassim al-Rimi tha në video-mesazh se Alshamrani kishte lëvizur përreth bazave amerikane “për disa vjet” për të përcaktuar objektivin që do të godiste.
Alshamrani vrau tre ushtarakë amerikanë dhe plagosi tetë të tjerë të cilët ndodheshin në bazë më 6 dhjetor.
