Ditët e fundit është shënuar një rritje e ndjeshme e rasteve të reja me Covid-19. Rastet dyshohen se janë rritur për shkak të grumbullimeve gjatë festave të fundvitit dhe mosrespektimit të masave anti-covid.
Epidemiologu, Dritan Ulqinaku i ftuar në një emision televiziv, ka deklaruar se edhe pse ka një rritje të ndjeshme të rasteve nuk është e nevojshme shtimi i masave anti-Covid, duke nënkuptuar shtrëngimin e orareve policore, apo karantinës së pjesshme apo të plotë.
Sipas epidemiologut Ulqinaku, masat anti-covid mund të ndryshojnë vetëm nëse kapacitetet spitalore do të jenë në kolaps total, ose që rrezikojnë tejmbushjen.
“Gjithmonë i shohim kapacitetet spitalore dhe trendin e rasteve të infektuara. Në momentin që ne e përballojmë themi që pjesa tjetër le të vazhdojë të jetojë jetën, të punojë dhe të gëzojë.
Por gjithmonë duke pasur kujdes se rreziku është shumë prezent. Në momentin që këto kapacitete do të vijnë duke u ezauruar, edhe masat do të vijnë duke u shtrënguar”, ka deklaruar epidemiologu Ulqinaku.
Kujtojmë se edhe pse para vendimit të djeshëm të Komitetit Teknik të Ekspertëve për rritjen e orës policore nga 20:30 në 22:00 të mbrëmjes, sërish kjo masë nuk është respektuar nga të gjithë.
Sidomos mund të veçojmë të rinjtë apo individë me imunitet politik e ekonomik, pasi lokale e restorante të ndryshme kanë qëndruar hapur dhe kanë patur rezervime e grumbullime edhe pas orës 20:30, sidomos gjatë festave të fundvitit./Gazetareforma.com/
