Mjeku Ilir Shani ka reaguar publikisht pas vdekjes së pacientes së tij, e cila ndërroi jetë pas një ndërhyrjeje kirurgjikale për ngushtimin e stomakut.
I akuzuar për neglizhencë mjekësore, Shani ka sqaruar përmes një deklarate se ndodhet përballë një situate shumë të dhimbshme dhe se ndjen përgjegjësi të japë shpjegime.
“Në emër të stafit mjekësor dhe në emrin tim personal, i shpreh ngushëllimet më të sinqerta familjes së të ndjerës. Kjo humbje është thellësisht e dhimbshme për të gjithë ne, pasi e ndjera ishte jo vetëm paciente, por edhe një e njohur e afërt për të cilën ushqenim respekt të veçantë,” është shprehur ai.
Sipas Shanit, operacioni u krye më 20 maj 2025 dhe përfundoi me sukses, ndërsa pacientja u transferua në pavijon në gjendje të mirë. Por mëngjesin e datës 21 maj ajo pësoi një ndërlikim të papritur.
“Ndihma mjekësore u ofrua menjëherë, por goditja rezultoi fatale dhe përpjekjet për ta rikthyer në jetë nuk patën sukses,” deklaroi ai, duke e cilësuar ngjarjen si pasojë të një infarkti akut masiv.
Shani theksoi se stafi mjekësor ka vepruar me përkushtim dhe është i hapur për bashkëpunim me institucionet që po hetojnë rastin.
“E kuptojmë dhe ndjejmë dhimbjen e familjes dhe jemi të gatshëm të ofrojmë bashkëpunimin e plotë me organet përkatëse,” përfundoi ai.
