Shefja e reanimacionit, njëherësh mjekja Alma Cani ka folur për situatën gripale që ka mbërthyer vendin.
Ajo komentoi arsyet pse njëri nga pacientët humbi jetën, duke përjashtuar mundësinë që ai të jetë prekur nga gripi AH1N1, i njohur ndryshe edhe si “gripi i derrit”.
“Pacienti vuante nga një patologji kronike. Ishte në reanimacion dhe nuk mundi të mbijetonte. Sa i përket gripit ne nuk kemi konfirmim për raste me “grip derri”, por janë të prekur nga gripi sezonal, kryesisht pacientë që vuajnë edhe nga sëmundje të tjera, përfshi këtu moshat e treta që janë më pak rezistente ndaj këtyre virozave. Këshilloj të bëhet vaksinimi paraprak dhe duhet të jenë në kontakt me mjekët e familjes dhe mjekët specialistë”– tha ajo.
Mjekja Cani sqaroi më tej të gjitha simptomat që ka gripi i sivjetshëm, masat që duhet të marrin të prekurit dhe kush janë më të rrezikuarit prej tij. Ajo shtoi se: “Agresiviteti i virozës së sivjetshme nuk është edhe aq i madh sa vitet paraprake”.
SIMTOMAT
“Gripi fillon me temperatura të larta, me kollë, me sekrecione, dhimbje koke dhe kyçesh. Të gjitha këto janë simptomat paraprake. Nëse nuk trajtohet mund të kalojë edhe në komplikacione si pneumoni sidomos tek qytetarët që kanë probleme kronike. Ritheksoj duhet të jenë të kujdesshëm dhe të bëjnë vaksinim.”
MASAT QË DUHEN MARRË
“Në rast se qytetarët kanë këto simptoma duhet të marrin masa, qoftë për temperaturën, qoftë për kollën. Nëse për dy tre ditë gjendja nuk përmirësohet duhet t’ju drejtohen mjekëve.”
KATEGORITË MË TË RREZIKUARA
“Unë e përmenda edhe më herët. Janë mosha e tretë, pacientët që vuajnë nga sëmundje kronike të mushkërive, të veshkave, me probleme hematologjike, kronike”.
