Gripi i shpendëve që u konfirmua para disa ditësh ne Durrës, tashmë ka prekur edhe pelikanët në zonën e Prespës.
Një çift pelikanësh në liqenin e Prespës në anën shqiptare kanë rezultuar të infektuar me gripin e shpendëve. Pelikanët janë gjetur ditën e enjte ndërkohë janë dërguar për analiza në laborator dhe sipas përgjigjeve bëhet fjalë për gripin e shpendëve.
Kujtojmë që disa ditë më parë ka qenë Agjencia e Ruajtjes dhe Mbrojtjes së Mjedisit e cila ka lajmëruar se gripi i shpendëve ka qenë aktiv në liqenin e Prespës në anën greke, e mesa duket gripi ka prekur tanimë dhe shpendët në territorin vendas.
Theksojmë se në Durrës prej disa ditësh mijëra pula kanë ngordhur dhe vazhdojnë të ngordhin për shkak të përhapjes së gripit të shpendëve.
Ndërkohë që nisur nga situata në vendin tonë, Kosova ka ndaluar importin e shpendëve nga Shqipëria.
Agjencia e Ushqimit dhe Veterinarisë ka njoftuar se ka marrë vendim për masat e ndalesës së importit të shpendëve të gjalla nga zona e infektimit pas paraqitjes së gripit të shpezëve në Shqipëri. Situata është alarmante në Durrës, ku kanë ngordhur afro 1 milion pula.
Mësohet se është ngritur pikë kontrolli veterinare në kufi ku AUV njofton se do të ketë mbikqyrje të detajuar të importeve të ngarkesave me shpendë.
