Ditën e sotme Zv. ministrja e Bujqësisë, Ermira Gjeci deklaroi se përveç pulave të ngordhura në Durrës si edhe pelikanit kaçurrel në Prespë, nuk ka vatra të tjera që është raportuar gripi i shpendit, duke mos sqaruar me çfarë ka ndodhur në pulat e ngordhura në Lushnje.
“Po kryehet tamponimi i zonës, është siguruar baza materiale. Vijon monitorimi i terrenit. Shërbimi vetenriar është prezent në çdo fermë. Po ashtu po kryen edhe suvejancë në të gjithë fermat që mbarshtojnë shpendë. Fermat që kanë problematika, duhet të bëjnë karantinim dhe të kontaktojnë shërbim veterinar. AKU është në terren në njësitë tregëtare për të garantuar të gjitha produktet dhe nënproduktet. Kemi tërhequr vezët nga tregu edhe pse nuk janë të dëmshme. Konsumatorët mund të kontaktojmë me numrin e gjelbër, duhet të drejtohen në të gjitha njësitë e licensuara. Si të dallojmë mishin e infektuar? Nuk ndodh që të shkojë në treg. Meraku më i madh që do pakësohet numri i shpendëve,”-tha në fjalën e saj Ermira Gjeci.
NJOFTIMI I PLOTË:
Bëjmë me dije publikun se në vijim të zbatimit të Urdhrit “Për miratimin e planit të kontigjencës së sëmundjes së influencës aviare”, po respektohet dhe po zbatohet me përpikëri çdo pikë e ktëij plani. Vijon procesi i eleminimit të shpendëve të sëmurë e asgjësimi i tyre në njësitë e konfirmuara të prodhimit nga laboratori i referencës ISUV për prani të influencës aviare. Deri tani kanë ngordhur rreth 340 mijë (338426) shpendë. Procesi i groposjes vazhdon me ritme të shpejta brenda rregullave dhe konform legjislacionit në fuqi. Procesi është dinamik dhe lëviz në varësi të rasteve të reja. Gjithashtu, ka nisur procesi i asgjësimit edhe i 120 mijë shpendëve të cilët ndodhen në të njëjtat kapanone dhe bateri për të shmangur çdo rrezik të mundshëm duke ndjekur planin e kontigjencës. Aktualisht:• po respektohen procedurat e shuarjes së vatrës; • po kryhet tamponimi i zonës sipas niveleve të rrezes; • po komunikohet risku për fermerët dhe veterinerët e zonës; • është siguruar baza materiale e ajo mbrojtëse për veterinerët.
Vijon monitorimi i terrenit në të gjithë Shqipërinë si në pikat e inspektimit kufitar, në bazë të planit të kontigjencës, ashtu edhe në përmbushje të mobilizimit për monitorim dhe kontroll për garantimin e sigurisë ushqimore për produktet e nxjera në treg. Shërbimi veterinar rajonal është prezent cdo ditë në komplekse duke mbikqyrur në mënyrë rigoroze zbatimin e masave të biosigurisë dhe dizinnfektimin e mjeteve të transportit. Shërbimi veterinar po kryen dhe survejance sindromike në të gjithë fermat që mbarështojnë shpendë si dhe po marrin kampione në të gjithë kapanonet e subjektit për të vërtetuar praninë ose mungesën e sëmundjeve. Fermat që konstatojnë problematika për shpendë të ngordhur në fermë, veçse duhet të bëjnë karantinim të menjëhershëm për shmangie përhapjeje, duhet të kontaktojnë Shërbimin Veterinar nëpërmjet numrit të gjelbër 0800 3366. Jemi në gatishmëri dhe bëjmë me dije se Autoriteti Kombëtar i Ushqimit është në terren me një plan veprimi të fokusuar tek shpendaria në njësitë tregtare dhe gjithë zinxhirin ushqimor për të garantuar gjithë produktet dhe nënproduktet me origjinë shpendore.
