Ministria e Bujqësisë dhe Zhvillimit Rural njofton qytetarët se situata e gripit të shpendëve, Influenca Aviare, është nën kontroll dhe monitorim të vazhdueshëm nga strukturat e Ministrisë në qendër dhe ato rajonale.
Sëmundja, e konfirmuar gjithashtu edhe në Shqipëri, është një infeksion me përhapje globale dhe aktualisht është e pranishme në disa shtete të tjera, të cilët zbatojnë programe të ngjashme për kontroll dhe mbikëqyrje.
Për parandalimin e përhapjes së virusit, Ministria thekson rëndësinë e masave të biosigurisë, të cilat ndihmojnë në uljen e mundësisë së ekspozimit ndaj virusit, që përhapet përmes ajrit dhe kontaktit me shpendët portatorë, të egër dhe migratorë.
Qendra Kombëtare e Krizës është e angazhuar për koordinimin e masave dhe monitorimin e situatës, ndërsa Shërbimi Veterinar Rajonal ka marrë masa për izolimin e infeksionit dhe parandalimin e përhapjes së tij.
Derimë tani, testimet për personat e kontaktit kanë rezultuar negative, dhe janë marrë masa të tjera, si ndalimi i lëvizjes së shpendëve të gjallë jashtë fermave në zonat e mbrojtjes dhe mbikëqyrjes.
Ministria fton fermerët dhe qytetarët që të ruajnë vigjilencën dhe të raportojnë çdo dyshim në kohë përmes linjës së ndihmës 08003366. Po ashtu, është e rëndësishme të zbatohen masat e biosigurisë për të kufizuar kontaktin e shpendëve me ato të egër dhe migratorë.
