Qindra taksistë grekë bllokuan mesditën e së mërkurës hyrjet dhe daljet e aeroportit të Athinës, duke pezulluar aktivitetin për gati dy orë.
Kjo protestë u organizua si pjesë e një greve 48-orëshe në sektorin e taksive, e cila synon të kundërshtojë politikat qeveritare që, sipas tyre, favorizojnë aktorë të tjerë dhe dëshmojnë mungesë mbështetje për ta.
Sindikalistët kërkojnë masa lehtësuese fiskale, reduktimin e konkurrencës nga autobusët turistikë, si dhe të drejtën për të përdorur korsitë e autobusëve urbanë, kërkesa kjo që është refuzuar me forcë nga Ministria e Transportit e Greqisë, e cila përpiqet të modernizojë një sistem urban transporti që konsiderohet ndër më problematikët në Bashkimin Europian.
Pas ndërprerjes në aeroport, taksistët u larguan duke premtuar se do të forcojnë aksionet e tyre protestuese në ditët dhe muajt në vijim.
