Policia Kufitare në Kapshticë ka njoftuar se për ditën e sotme është pezulluar kuota ditore e kalimit të emigrantëve shqiptarë për në territorin grek.
Me anë të një njoftimi zyrtar, policia ka bërë me dije se kuota ditore prej 300 qytetarëve që duhet të kalojnë kufirin është plotësuar, duke i bërë kështu thirrje udhëtarëve të tjerë që mos të kalojnë më për sot drejt Kapshticës pasi nuk do të lejohen.
Njoftimi i policisë:
Stacioni i Policisë Kufitare Kapshticë: Njoftojmë të gjithë qytetarët që janë të interesuar të kalojnë në drejtim të shtetit grek, se aktualisht kuota prej 300 shtetas është plotësuar dhe nga ana e policisë greke është pezulluar puna e nuk do të lejohet kalimi i personave të tjerë për ditën e sotme.
Policia Kufitare apelon për qytetarët që duan të udhëtojnë në drejtim të Greqisë, që të mos vijojnë udhëtimin në drejtim të PKK Kapshticë për ditën e sotme.
Ju faleminderit për mirëkuptimin!
