Këshilli Bashkiak i Tiranës ka miratuar ditën e sotme 3 mijë pagesat e para grante për Rindërtimin si dhe 200 dosjet e para të shtëpive në zonat rurale.
Kryebashkiaku i Tiranës, Erion Veliaj në fjalën e tjj ka thënë se 3 mijë pagesat që do të miratohen sot do të jepen duke filluar nga java tjetër.
Këto janë grantet e para që jep Bashkia Tiranë, pasi Bashkia e Shijakut ishte e para.
“Sot janë 3 mijë familje të kategorive DS1, DS2 dhe DS3 që marrin pagesat cash. Do të vazhdojmë kështu, nga 3 mijë në çdo mbledhje, që t’i afrohemi sa më shpejt shifrës së 10 mijë dosjeve, të gjitha nga tërmeti i nëntorit.
Kemi gati edhe 200 dosjet e para për shtëpitë që do të rindërtohen, kryesisht në zonat rurale. Nuk bëhet fjalë për pallatet, por për shtëpitë private familjare. Me këtë lot hapen disa kantiere pune në shumë prej zonave rurale të Tiranës, për të filluar në kohë rekord edhe ndërtimin e shtëpive. Për 200 dosjet e shtëpive të reja do të procedohet me një kontratë me operatorin që do ta ndërtojë. Sigurisht, kontrata na lipset pasi të marrim çelësat në dorë, që të kemi mundësi ta hipotekojmë. Për të gjithë këto procedura, çdo njësi administrative do të informojë qytetarët që përfitojnë nga procesi i rindërtimit.”
Ndër të tjera kryebashkiaku Veliaj deklaroi se do të shemben 41 pallate në Tiranë, vendim ky i marrë për zonat Kombinat dhe Kinostudio, pasi nuk janë të sigurta për jetesën e banorëve.
“Janë pallate kryesisht në zonën e Kombinatit, disa në Kinostudio dhe shumë më pak në zonat e tjera. Me t’i pasur të gjitha procesverbalet, do të vijmë në Këshill Bashkiak. Do të presim nëse do të ketë të tjerë që janë në proces verifikimi nga inxhinierët, të cilët na japin përfundimin nëse një ndërtesë qëndron dhe mund të rikuperohet, ose nëse duhet t’i hapim udhë një lagjeje të re, ku do të ndërtojmë jo vetëm me më shumë cilësi, por edhe me hapësira shumë më dinjitoze”,
Në këtë mënyre u hapet rruga ndërtimit të pallateve të reja dhe ndërtesave shumëkatëshe nga Bashkia Tiranë. Të cilat sipas Veliajt do të jenë më cilësore dhe dinjitoze për banorët e Tiranës.
Ndëtimet e reja të pallateve në Tiranë kanë ngjallur shumë debate e protesta tek banorët e Tiranës pasi problemet e pronësisë dhe mosdakordësia në shpërblime me Bashkinë Tiranë janë të vazhdueshme.
