Një grabitje e bujshme në Muzeun e Luvrit ka tronditur Parisin dhe ka detyruar mbylljen e menjëhershme të institucionit më të vizituar në botë, duke shkaktuar panik mes turistëve dhe një operacion masiv policor në zemër të kryeqytetit francez.
Tre persona të maskuar, të përshkruar nga policia si “kriminelë të organizuar mirë”, arritën të hynin në ambientet e muzeut dhe të largoheshin me bizhuteri historike me vlerë miliona paund, që i përkisnin dikur Napoleon Bonapartit dhe Perandeshës Joséphine.
Ngjarja ndodhi të dielën në mëngjes, pak pas hapjes së muzeut. Sipas raportimeve të Le Parisien, autorët hynë nga ana e lumit Seine, ku po zhvillohen punime ndërtimi, dhe përdorën një ashensor ngarkese që i çonte drejtpërdrejt në dhomën e ekspozimit ku ruheshin bizhuteritë. Dy prej tyre thyen dritaret për të hyrë, ndërsa një i tretë qëndroi jashtë në roje. Nga salla u morën nëntë objekte nga koleksioni i Napoleonit dhe Joséphinës, përfshirë një varëse dhe një brosë të rrallë.
Turistët që ndodheshin në muze përshkruan momente tensioni dhe kaosi gjatë evakuimit. “Radhët ishin të gjata kur na njoftuan se muzeu do të mbyllej sepse dikush kishte tentuar të vidhte diçka. Pastaj erdhën policët dhe nisi evakuimi. Ishte kaos, megjithatë disa njerëz vazhdonin të bënin selfie ndërsa policia i nxirrte jashtë”, tha për The Sun një vizitor nga Britania.
Një tjetër vizitor britanik shtoi: “Ngjarja dukej si një skenë nga The Da Vinci Code. Ishte e frikshme, por edhe misterioze. Sirenat binin për gjysmë ore dhe askush nuk e dinte çfarë po ndodhte.”
Autoritetet franceze kanë nisur një hetim të gjerë për të zbuluar mënyrën se si grabitësit arritën të depërtojnë në një nga institucionet më të ruajtura të Europës. Me mbi 380 mijë objekte në koleksion dhe 8–9 milionë vizitorë në vit, Luvri është një simbol i kulturës franceze dhe strehon vepra të famshme si Mona Lisa dhe Venera e Milos.
Në një reagim në rrjetin X, ministrja e Kulturës, Rachida Dati, deklaroi: “Një grabitje ka ndodhur këtë mëngjes në hapjen e @MuseeLouvre. Nuk ka lëndime për t’u raportuar. Jam në vendngjarje së bashku me ekipet e muzeut dhe policinë. Hetimet po vazhdojnë.”
Kjo ngjarje rikujton se edhe institucionet më të sigurta kulturore nuk janë të paprekshme. Në historinë e Luvrit, një nga grabitjet më të famshme mbetet ajo e vitit 1911, kur Mona Lisa u vodh nga një punonjës i muzeut dhe u rikthye pas dy vjetësh. Ngjarje të ngjashme janë regjistruar edhe në muze të tjerë parizienë, si në Musée Cognacq-Jay në vitin 2024 dhe në Muzeun e Artit Modern në 2010.
Grabitja e fundit në Luvër ka ringjallur shqetësimet për sigurinë e trashëgimisë kulturore botërore, duke vënë në pikëpyetje mbrojtjen e thesareve historike që përfaqësojnë identitetin dhe historinë e qytetërimeve.
