Pagat e zjarrëfikësve janë ulur me 5 mijë lekë të reja që prej dhjetorit në Tiranë. Ndërkohë, në qytetet të tjera paga ka muaj që është ulur. Lajmin e ka konfirmuar abc news, e cila ka kontaktuar edhe me kreun e sindikatës së zjarrëfikësve. Ai është shprehur se VKM-ja që ka nxjerr qeveria bie ndesh me kodin e punës dhe se një punëtor zjarrëfikës ka tashmë në xhep 200 mijë lekë më pakë pavarësisht se është në gatishmëri çdo ditë të vitit.
“Në total, një punonjësi zjarrfikës në xhep i mungojnë 200 mijë lekë, duke llogaritur ditën e shtunë e të dielë, orët e natës, ditët e festave.
VKM 203 që bie ndesh me kodin e punës, ku thuhet që një zjarrfikës nuk mund të paguhet ditë të shtunë e të dielë, ditë feste i ka ditë normale pune. Ndërkohë që një zjarrfikës gjatë gjithë vitit është në gatishmëri”, sqaron Bledar Bajrami, kreu i sindikatës.
Sipas tij nuk po zbatohet vendimi i ri i qeverisë, i marrë më 10 Prill të 2019-ës që parashikon rritje të shpërblimeve.
Në ligj thuhet se do të përfitojnë 25% për çdo orë pune shtesë, 50% për çdo orë pune gjatë pushimit javor. Një tjetër rritje është edhe puna gjatë festave zyrtare. Në këto ditë, sanksionon 25% për çdo orë pune. Gjithashtu, për shërbimet e kryera gjatë orëve të natës parashikohet 50 %.
Por vendimi nuk është zbatuar dhe asnjë nga ndryshimet në ligj nuk është reflektuar në pagat e zjarrfikësve. Abc shkruan se vendimi nuk është zbatuar nga Bashkia, të paktën sipas pretendimit të Ministrisë sës Brendshme.
Shkeljen e ka konstatuar edhe Shërbimi për Çështjet e Brendshme dhe Ankesat, i cili i është drejtuar Bashkisë me një kërkesë zyrtare. Pretendimi i tyre është se problemet me pagën kanë ardhur pasi shefat e shërbimeve zjarrfikëse nuk kanë përpiluar kartelën për çdo orë shtesë që ka kryer një punonjës.
Kreu i sindikatës, Bledar Bajrami, i cili punon edhe vetë si zjarrfikës në kryeqytet ka kërkuar zbatimin e vendimit.
“Të paguhen orët e natës për zjarrfikësit sipas Kodit të Punës, sipas ligjit. Unë kam pasur telefonata dhe të gjithë zjarrfikësit janë gati të lënë edhe punën, janë gati të dalin edhe në protestë, nuk është koha, është pandemi”, ka thënë ai.
Vendimi më 10 prill 2019 për zjarrfikësit:
– 25 % për çdo orë pune/shërbimi shtesë në ditë të zakonshme pune;
– 50 % për çdo orë pune/shërbimi shtesë të kryer gjatë pushimit javor;
– 25% për çdo orë pune në ditët e festave zyrtare;
– 50% për çdo orë pune në ndërhyrje operacionale të kryer nga ora 22:00 deri në orën 06:00.
