Ashtu si edhe ishte parashikuar, është mbajtur interpelanca me Ministrin e Brendshëm, Sandër Lleshaj për vjedhjen në aeroportin e Rinasit.
Lleshaj gjatë fjalës së tij e ka konsideruar një akt të rendë grabitjen, por nuk është një ngjarje apokaliptike dhe ka përsëritur edhe një herë se siguria kombëtare nuk cenohet nga pesë grabitës.
“Ngjarja e Rinasit është shumë e rëndë, pasi është episod i përsëritur. Kjo ngjarja ka marrë të gjithë vëmendjen e dukur të institucioneve të sigurisë, pavarësisht angazhimeve të tjera që ka pasur policia. Duhet të kemi parasysh se nuk është një ngjarje apokaliptike dhe siguria kombëtare e Shqipërisë nuk mund të cenohet nga një grup prej 5 grabitësish”, ka thënë Ministri i Brendshëm Sandër Lleshaj.
Gjithashtu Lleshaj ka thënë se vendimi për kontraktorin privat, i cili do mbronte Aeroportin e Rinasit është marrë në Kuvend para 15 viteve, gjë që sipas tij është e papranueshme. Ministri ka thënë se nëse jashtë territorit të aeroportit përgjegjësia për sigurinë është e policisë, brenda atij territori, përgjegjësia është e gjitha e kontraktorit.
“Vendimi për sigurinë e aeroportit është marrë në këtë Kuvend, para 15 vitesh, për t’ia dhënë një kontraktori privat. Unë nuk do ta kisha votuar kurrë. Ju e dini kush ka qëndruar këtu për 15 vite. Operatori ka njoftuar 5 minuta e 21 sekonda më vonë Policinë e Shtetit, pasi policia kishte marrë njoftimin ndërkohë në rrugë të treta. 6 minuta e 30 sekonda më vonë nga fillimi i ngjarjes, ka njoftuar Aeroportin. E ka njoftuar Aviacionin Civil Shqiptar 30 minuta pasi ka ndodhur ngjarja. Kontraktori privat i sigurisë së aeroportit nuk ka lënë Forcat e Ndërhyrjes së Shpejtë për të hyrë në aeroport. Është ngjarje e përsëritur. Perimetri i jashtëm i aeroportit është përgjegjësi e policisë, si çdo cep i vendit. Siguria brenda aeroportit është përgjegjësi e kontraktonit”, është shprehur Sandër Lleshaj gjatë interpelancës në Kuvend.
