Kanë kaluar pak muaj nga grabitja në Rinas, e ndodhur në 9 prill të këtij viti. Miliona euro u grabitën në pistën e Rinasit, ku deri tani janë arrestuar 7 persona e ndërsa në kërkim është Klement Çalja.
Ditën e sotme, 7 të arrestuarit për grabitjen në Rinas, kanë kërkuar ndryshimin e masës së sigurisë në gjykatën e Krimeve të Rënda.
Të arrestuarit kanë kërkuar zëvendësimin e masës “arrest me burg” me një masë më të butë. Madje ata kanë kërkuar që prokuroria t’iu komunikojë rezultatet e hetimeve të dy muajve të fundit.
7 personat e arrestuar kanë kërkuar që të mos merren si prova deklaratat e dhëna nga Alkond Bengasi. Ky i fundit është i vetmi pjestar i grupit kriminal që mori pjesë në grabitjen e miliona eurove në aeroport.
Bengasi ka bashkëpunuar me drejtësinë shqiptare, e madje të gjitha arrestimet janë bërë nga deklaratat e tij i cili ka dhënë prova mjaft të forta.
Të arrestuarit kanë kërkuar edhe ballafaqim me Alkond Bengasin. Bengasi ishte autor i modifikimit të automjetit me mbishkrimin “Hetimi Tatimor”.
